సహజీవనం చేసినోడే శవాన్ని చేశాడు

సహజీవనం చేసినోడే శవాన్ని చేశాడు


తగరపువలస(విశాఖ): వారిద్దరూ ఒకరినొకరు ఎంతగానో ఇష్టపడ్డారు. కొన్నేళ్లుగా సహజీవనం చేస్తున్నారు. అనుమానమనే భూతం వీరి మధ్య చిచ్చుపెట్టింది. వివరాల్లోకి వెళితే... తగరపువలస సమీపంలోని చిప్పాడ దివీస్‌ కంపెనీలో రోజు కూలీగా పనిచేస్తున్న కె.శాంతి ఈనెల 25న ఉరివేసుకుని మృతిచెందినట్లు భీమిలి పోలీసులు కేసు నమోదు చేశారు. పోస్టుమార్టం నివేదిక ఆధారంగా అనుమానం వచ్చిన పోలీసులు దీనిపై లోతైన విచారణ చేశారు. ఈమెతో సహజీవనం చేస్తున్న చిన్నారావు అనే యువకుడు పిడిగుద్దులు గుద్ది, ఆపై పీక నులిమి ప్రాణాలు తీసినట్లు తేలింది. మృతురాలిది శ్రీకాకుళం జిల్లా పాతపట్నం మండలం బాసగిట్టంగి గ్రామం. నిందితుడిది ఆ పక్కనే ఉన్న పెదగిట్టంగి గ్రామం. ఏడు నెలల కిందట వీరు చిప్పాడ దివీస్‌లో రోజు కూలీలుగా చేరారు. సమీపంలోని రేకులషెడ్డులో నివాసం ఉంటున్నారు. ఎప్పటిలాగే ఈ నెల 25న ఇద్దరూ విధులకు వెళ్లారు. అక్కడ వీరి మధ్య ఘర్షణ జరిగింది. తీవ్ర మనస్తాపానికి గురైన శాంతి షెడ్డుకి వెళ్లి తలుపులు వేసుకుంది. కొద్దిసేపటి తర్వాత అక్కడికి చేరుకున్న చిన్నారావు ఆమెను నోటికి వచ్చినట్లు తిట్టాడు. దీంతో ‘నేను నిన్ను పెళ్లిచేసుకోను. నన్ను కొడుతున్నావ్‌..’ అని ఆమె అనడంతో ఈ ఘాతుకానికి ఒడిగట్టాడు. కేసు నమోదు చేసి నిందితుడిని రిమాండుకు పంపినట్లు భీమిలి సీఐ వెంకట నారాయణ తెలిపారు.