బంధువుగా పరిచయమై అత్యాచారం! ఫోన్‌లో చిత్రీకరించి బెదిరింపులు ....- సూత్రధారి తండ్రేనంటూ ఆరోపణ

బంధువుగా పరిచయమై అత్యాచారం!

ఫోన్‌లో చిత్రీకరించి బెదిరింపులు

గుంటూరు నేరవార్తలు, న్యూస్‌టుడే: బంధువుగా తండ్రి ద్వారా పరిచయమైన వ్యక్తి తనను కొట్టి, సిగరెట్లతో కాల్చి భయపెట్టి అత్యాచారం చేశాడంటూ బాలిక సోమవారం ‘స్పందన’లో అర్బన్‌ ఏఎస్పీ వైటీ నాయుడుకు ఫిర్యాదు చేసింది. ఈ దారుణానికి తన తండ్రే సూత్రధారి అంటూ ఆరోపించింది. తనను లైంగికంగా వేధించిన యువకుడితో పాటు అతడిని పరిచయం చేసిన తండ్రిపైనా ఫిర్యాదు చేస్తే.. ప్రభుత్వ ఉద్యోగి అయిన తండ్రి పేరును ఫిర్యాదు నుంచి పోలీసులు తొలగించారని బాధితురాలు పేర్కొంది. వారిపై చర్యలు తీసుకోవాలని కోరింది. స్పందించిన ఏఎస్పీ బాధితురాలి ఫిర్యాదుపై విచారణ జరిపించి న్యాయం చేస్తామని భరోసా ఇచ్చారు. ఈ సందర్భంగా బాధితురాలు విలేకరులకు తనకు జరిగిన అన్యాయం గురించి వివరించింది.
ఫొటోలు, వీడియోలతో బెదిరించి..: గుంటూరురూరల్‌ మండలానికి చెందిన తాను గుంటూరులో ఇంటర్మీడియట్‌ చదువుతున్నట్లు బాధితురాలు పేర్కొంది. తండ్రి మలేరియా శాఖలో ఉద్యోగని, తల్లిదండ్రుల మధ్య మనస్పర్థలు రావడంతో నాన్నపై అమ్మ పోలీసులకు ఫిర్యాదు చేసిందని వివరించింది. విచారణ జరుగుతున్నందున అప్పటి నుంచి తల్లి వద్ద ఉంటున్నట్లు తెలిపింది. ఈ క్రమంలో తండ్రి ఒకరోజు తన కళాశాల వద్దకు కృష్ణ అనే యువకుడిని తీసుకొచ్చి బంధువుగా పరిచయం చేశాడంది. అలా అతను గత డిసెంబర్‌ నుంచి కళాశాలకు వస్తూ ఉండేవాడని, బంధువు కదా మాట్లాడేదాన్నని, దాన్ని అలుసుగా తీసుకొని గత డిసెంబర్‌లో ఏదో మాట్లాడాలంటూ ఓ లాడ్జికి తీసుకెళ్లాడని బాధిత బాలిక పేర్కొంది. అక్కడ అతను తనను హింసించి అత్యాచారం చేసి, చరవాణిలో చిత్రీకరించాడని ఆమె ఆరోపించింది.. ఈ విషయం బయటకు చెపితే ఫొటోలు, వీడియోలు అంతర్జాలంలో పెడతానంటూ బెదిరించాడని పేర్కొంది. ఇదే రీతిలో మరోసారీ అఘాయిత్యానికి పాల్పడ్డాడని చెప్పింది. ఆ సమయంలో తన తల్లి పదేపదే ఫోన్‌ చేయడంతో బస్టాండ్‌ వద్ద వదిలిపెట్టి వెళ్లాడని, ఎందుకు ఆలస్యమైందని అమ్మ నిలదీయడంతో జరిగిన విషయమంతా చెప్పానని బాధితురాలు వివరించింది. భార్యపై ఉన్న అక్కసుతో తండ్రే ఇదంతా చేశాడని బాధితురాలు ఆరోపించింది.